पणजी – गोवा सरकारने ‘गोवा प्राचीन स्मारके आणि पुरातत्त्व स्थळे आणि अवशेष कायदा, १९७८’ अंतर्गत फोंडा येथील ‘मर्दनगड’ आणि जुने गोवे येथील ‘हातकातरो खांब’ या ऐतिहासिक वास्तूंना अधिसूचना काढून संरक्षित स्थळांचा दर्जा दिला आहे. या पार्श्वभूमीवर ‘हिंदु जनजागृती समिती’ आणि ‘मर्दनगड संरक्षण समिती’ यांच्या पदाधिकार्यांनी २३ सप्टेंबर या दिवशी सायंकाळी मुख्यमंत्री डॉ. प्रमोद सावंत यांची भेट घेऊन सरकारचे अभिनंदन केले. या वेळी हिंदु जनजागृती समितीचे राष्ट्रीय प्रवक्ते श्री. रमेश शिंदे, समितीचे गोवा राज्य समन्वयक श्री. सत्यविजय नाईक, ‘मर्दनगड संवर्धन समिती’चे सर्वश्री राजेंद्र देसाई, नारायण नाडकर्णी, मनोज गावकर, सूचेंद्र अग्नी आणि स्वप्निल नाईक यांची उपस्थिती होती.
फोंडा येथील मर्दनगड किल्ला हा छत्रपती संभाजी महाराज यांनी स्वत: बांधलेला एकमेव किल्ला आहे. हा किल्ला महाराजांचे शौर्य आणि धैर्य यांचे प्रतीक आहे, तसेच जुलमी पोर्तुगीज राज्यकर्त्यांनी गोमंतकातील हिंदूंवर केलेल्या अनन्वित अत्याचाराची जुने गोवे येथील ‘हातकातरो खांब’ ही गोव्यातील एकमेव साक्ष आहे. या दोन्ही ऐतिहासिक वास्तूंचे संरक्षण करण्याचा सरकारचा प्रयत्न स्तुत्य आहे, तसेच आता या ऐतिहासिक वास्तूंच्या संवर्धनासाठी आणि विकासासाठी सरकारने प्रयत्न करावेत, अशी मागणी मुख्यमंत्री डॉ. सावंत यांच्याकडे केली आहे, असे हिंदु जनजागृती समितीने म्हटले आहे.
‘हातकातरो खांब’ संरक्षित स्मारके घोषित केल्याबद्दल गोवा सरकारचे अभिनंदन ! – हिंदु जनजागृती समिती
गोवा सरकारने ‘गोवा प्राचीन स्मारके आणि पुरातत्व स्थळे आणि अवशेष कायदा, १९७८’ अंतर्गत जुने गोवे येथील ऐतिहासिक ‘हातकातरो खांब’ आणि फोंडा येथील ‘मर्दनगड’ या वास्तूंना अधिसूचना काढून संरक्षित स्थळांचा दर्जा दिला आहे. हिंदूंच्या अनेक वर्षांच्या मागणीला मिळालेल्या या यशाचे हिंदु जनजागृती समिती राष्ट्रीय स्तरावरून स्वागत करत असून या ऐतिहासिक निर्णयाबद्दल गोवा सरकारचे मनःपूर्वक अभिनंदन करत आहे, अशी माहिती समितीचे राष्ट्रीय प्रवक्ते श्री. रमेश शिंदे यांनी दिली.
जुलमी पोर्तुगीज राजवटीत आणि ‘इन्क्विझिशन’च्या काळ्याकुट्ट काळात गोमंतकीय हिंदूंवर जे अनन्वित अत्याचार झाले आणि त्यांना ज्या अमानुष शिक्षा दिल्या गेल्या, त्याचे ‘हातकातरो खांब’ हे एकमेव जिवंत आणि प्रातिनिधिक प्रतीक आहे. धर्मासाठी प्राणांतिक यातना सहन करणाऱ्या त्या स्वाभिमानी हिंदूंच्या बलिदानाचे स्मरण भावी पिढ्यांना रहावे, यासाठी या ‘हातकातरो खांबा’चे ऐतिहासिक वारसा म्हणून जतन होणे अत्यंत आवश्यक होते. यासाठी हिंदु जनजागृती समितीने गेल्या अनेक वर्षांपासून मोठा लढा उभारला. समितीने यासाठी असंख्य निवेदने दिली, आंदोलने केली, पत्रकार परिषदा घेतल्या आणि ‘गोवा क्रांतीदिनी’ हुतात्म्यांना श्रद्धांजली वहात या विषयाकडे सरकार व इतिहासप्रेमींचे लक्ष वेधले होते. अखेर समितीच्या आणि हिंदू संघटनांच्या या प्रदीर्घ लढ्याला मोठे यश आले आहे.
याचबरोबर फोंडा येथील ‘मर्दनगड’ हा छत्रपती संभाजी महाराजांनी बांधलेला गोव्यातील एकमेव किल्ला असून तो महाराजांचे शौर्य आणि धैर्य यांचे महान प्रतीक आहे. या ऐतिहासिक ठेव्याचे संवर्धन होऊन तो भावी पिढीपर्यंत पोहोचावा यासाठी ‘मर्दनगड संवर्धन समिती’ने पुढाकार घेतला होता, ज्यामध्ये हिंदु जनजागृती समितीही सक्रिय सहभागी होती. मर्दनगडाला संरक्षित स्मारक घोषित करणे, हे गोमंतकातील हिंदु संघटना आणि इतिहासप्रेमींनी उभारलेल्या मोहिमेचेच मोठे यश आहे.
सरकारच्या या महत्त्वपूर्ण निर्णयानंतर आता ‘हातकातरो खांब’ आणि ‘मर्दनगड किल्ला’ यांचा खरा इतिहास दर्शवणारे माहिती फलक त्या परिसरात तात्काळ लावावेत, अशी मागणी समितीने केली आहे. तसेच या दोन्ही स्मारकांचा धगधगता इतिहास शालेय पाठ्यपुस्तकांमध्ये समाविष्ट करावा आणि गोव्यातील सर्व गड-किल्ल्यांच्या संवर्धनासाठी गोवा सरकारने तातडीने स्वतंत्र ‘गड-दुर्ग संवर्धन प्राधिकरण’ स्थापन करावे, अशी आग्रही मागणीही हिंदु जनजागृती समितीचे राष्ट्रीय प्रवक्ते श्री. रमेश शिंदे यांनी या पत्रकाद्वारे केली आहे.
