मंदिरात वस्त्रसंहिता फलक लावण्याचा मंदिर विश्वस्तांचा निर्धार
रत्नागिरी (महाराष्ट्र) – मंदिर संस्कृती रक्षणाच्या उद्देशाने कार्यरत असलेल्या महाराष्ट्र मंदिर महासंघाचे राज्यस्तरीय अधिवेशन सातारा येथे मार्च महिन्यामध्ये होणार आहे. त्याची आणि मंदिर महासंघाच्या लढ्याला मिळत असलेले यश याची माहिती देण्यासाठी सावर्डे आणि सरंद (माखजन) विभागातील मंदिर विश्वस्तांची बैठक घेण्यात आली. या बैठकीत मंदिरांचे पावित्र्य रक्षणाचा एक भाग म्हणून मंदिरात वस्त्रसंहिता (ड्रेस कोड) फलक लावण्याचा निर्धार मंदिर विश्वस्तांनी व्यक्त केला. या बैठकीला महाराष्ट्र मंदिर महासंघाचे राज्य संघटक श्री संजय जोशी आणि जिल्हा संघटक श्री सुरेश शिंदे उपस्थित होते.
१९ देवस्थानांचे ३५ मंदिर विश्वस्त
सावर्डे येथिल श्री भवानी मंदिरात आणि सरंद (माखजन) येथील श्री गणपती मंदिरात झालेल्या या बैठकांना कोकरे देवस्थानचे प्रमुख श्री परशराम दळवी, आबीटगाव देवस्थानचे श्री. दीपक शिर्के, निवळी देवस्थानाचे श्री. सुरेंद्र सुर्वे, तळवडे देवस्थानाचे श्री. नंदू विचारे, मावळंगे येथील अनिल मोरे, शिंदे आंबेरी येथील श्री. रविकांत शिंदे, आंबव पोंक्षे येथील श्री. प्रकाश पोंक्षे, बुरंबाड येथील श्री. संजय सहस्त्रबुद्धे, माखजन येथील श्री. नितीन सागवेकर यांच्यासह १९ देवस्थानांचे ३५ मंदिर विश्वस्त उपस्थित होते.
देवस्थानांच्या प्रतिनिधींचा विशेष सहभाग
मंदिरात राबवणारे उपक्रम ,वस्त्रसंहिता, सामूहिक आरती, मंदिरे धर्मशिक्षणाची केंद्रे व्हावीत, याबाबतची माहिती श्री. सुरेश शिंदे यांनी दिली. यावेळी या बैठकीला सावर्डे देवस्थानाचे प्रदीप चव्हाण, कूटरे देवस्थानाचे श्री. विशाल परकर, ढाकमोली देवस्थानाचे श्री. राजेश लाड, वारेली देवस्थानाचे श्री. दीपक कदम या मंदिर विश्वस्तांनी बैठक आयोजनात विशेष पुढाकार घेतला.
क्षणचित्र
सावर्डे आणि सरंद येथील बैठकीत १३ देवस्थानांच्या प्रतिनिधींनी वस्त्रसंहिता फलकाची मागणी केली.
