अश्विन शुक्ल प्रतिपदेपासून नवरात्रोत्सव सुरू होतो. हा आदिशक्तीच्या उपासनेचा सण आहे. आपण सर्वांनी आनंदी राहावे आणि आदर्श जीवन जगता यावे यासाठी देवाने सणांची निर्मिती केली आहे; परंतु सध्या सण आणि उत्सवांकडे केवळ मौजमजेचे रूप म्हणून पाहिले जाते. त्याचबरोबर त्यात गैरप्रकार देखील वाढले आहेत. त्यामुळे देवीतत्व जागृत करणाऱ्या नवरात्रोत्सवाचे पावित्र्य नष्ट होत आहे. नवरात्रोत्सव म्हणजे आपल्यात असलेल्या दुर्गादेवीची शक्ती जागृत करणे. सध्या स्त्री कमकुवत असल्याने तिच्यात प्रतिकार करण्याची क्षमता कमी झाली आहे; त्यामुळे महिलांवरील अत्याचारात वाढ झाली आहे. राणी लक्ष्मीबाई यांनी इंग्रजांविरुद्ध लढा दिला. आपणही आपल्यातील देवीतत्त्व भक्तीने जागृत करून स्वतःच्या आणि राष्ट्राच्या रक्षणार्थ सिद्ध व्हायला हवे. चला तर मग नवरात्रोत्सवातील गैरप्रकारांना आळा घालून या सणाचे पावित्र्य जपण्याचा संकल्प करून देवीची कृपा संपादन करूया. आपल्यातील क्षात्रवृत्ती जागृत करून राष्ट्र आणि धर्म यांच्या रक्षणासाठी सिद्ध होऊया. हाच खरा नवरात्रोत्सव आहे.